លោក កឹម សុខា​ ៖ ខ្ញុំុំមិនបារម្ភពីការ​ចាប់ខ្លួននោះទេ

ដោយ ៖ វ៉ា វឌ្ឍនៈ ថ្ងៃព្រហស្បតិ៍ ទី២៦ ខែមីនា ឆ្នាំ២០១៥ ម៉ោង ០៩:០៤ រាជធានីភ្នំពេញ​ ៖ អនុប្រធានទី១រដ្ឋសភា​ លោក កឹម សុខា ​បានមានប្រសាសន៍ថា​ " ខ្ញុំមិនចាប់អារម្មណ៍​នឹងការដកអភ័យឯកសិទ្ឋិ ​ឬ ចាប់ខ្លួននោះទេ" ។លោកអនុប្រធាន​គណបក្សសង្គ្រោះជាតិ​មានប្រសាសន៍ខាងលើបែបនេះ ​បានធ្វើឡើងនៅ​ព្រលានយន្តហោះ​អន្តរជាតិភ្នំពេញ ​វេលាម៉ោងប្រមាណ​១១​យប់​ថ្ងៃទី២៥ ​មីនា ២០១៥​ ​បន្ទាប់ពីលោក​បានបញ្ចប់បេសកកម្ម​នៅសហរដ្ឋអាមេរិក ។ បើតាមលោក​ កឹម សុខា ​បេសកកម្មរបស់​លោកនៅអាមេរិកគឺ​ដើម្បីពន្យល់និងលើកឡើង​ពីការវិវត្តនយោបាយ​នៅកម្ពុជាជូនសកម្មជន និង អ្នកគំាទ្រ ហើយថា​ក្នុងដំណើរទស្សន​កិច្ចនេះដែរ ​លោកបានជួបអនុរដ្ឋមន្រ្តីការបរទេស ​សមាជិកព្រឹទ្ឋសភា​ រដ្ឋសភាអាមេរិក ​និងជួបពលរដ្ឋខ្មែរ​ក្នុងរដ្ឋចំនួន៧ ។ ជាការកត់​សម្គាល់ការលើកឡើង​របស់លោកអនុប្រធាន​គណបក្សប្រឆាំងខាងលើនេះដែរ ​បានធ្វើឡើងបន្ទាប់ពី​សម្តេចតេជោ ​ហ៊ុន សែន​ កាលពីសបា្កហ៍​មុនបានព្រមាន​ចាត់វិធានការច្បាប់​លើឥស្សរជនណា​ដែលប៉ុនប៉ង​ផ្តួលរំលំរាជរដ្ឋាភិបាល ​ហើយដែលការព្រមាននេះ​ ​ត្រូវបានគេគិតថាសំដៅដល់លោក កឹម សុខា​នោះ ៕

brought to you by IT Koh Trol